التويتات اللي جاية هحكي فيها اللي شوفته إمبارح والنهاردة في السويس عشان ضميري يستريح وابقى خلصت ذمتي قصاد ربنا #Suez
الموضوع إبتدى بمسيرة من عزا جونيور وكانت مسيرة سلمية ولما راحت ناحية المحافظة الداخلية افتكرتهم جايين يهاجموا راحوا ضربوا غاز وابتدت المعركة
انا نزلت بعد ما الداخلية هاجمت المسيرة وكنا زي اي معركة بنحدف طوب وساعات باراشوتات وكدة .. امبارح اتضربت كمية باراشوتات غريبة واصابت عساكر
الوقت دة الداخلية برضه مكنتش بتوقف الخرطوش والمطاطي والغاز وفجأة دخل وسطنا واحد معاه سلاح وضرب منه 3 مرات حي ع الامن وبعدين إختفى
وجه واحد تاني برضه وضرب حي ع الامن وإختفى بعدها وكان فيه ناس معاها كباسات بتضرب خراطيش والامن كان فاشخنا وضرب حي ومطاطي
جينا بعدها روحنا وصحيت النهاردة نزلت لقيت المعركة لسة شغالة والكباسات اكتر من امبارح من وشوش انا معرفهاش ولا شوفتها في مظاهرات قبل كدة
الضرب كان متبادل بين هنا وهنا الداخلية بخرطوش ومطاطي ومسيل والناس بترد بالكباسات والبارشوتات والباراشوتات عورت عساكر وإحنا سقط من وسطنا كتير
فيه واحد صاحبي عمل نفسه من سكان المنطقة وراح وقف الناحية التانية عند المديرية لقى فيه عساكر مصابة واتضرب عليه خرطوش من ناحيتنا
انا مشيت الساعة 5 تقريبا وبعدين صحابي كلموني قالولي إن فيه واحد عرباوي بآلي جه وضرب على قوات الامن
نسيت اقول إن اول امبارح كان فيه اشتباكات وواحد جه ضرب ع الامن بكباس وبعدها لف ضرب في المتظاهرين برضه
بعدها نزلت تاني اشوف الجوعامل إزاي ولما لقيت الضرب بغباء من الطرفين وفيه ناس بتقع من هنا ومن هنا قولت انا مش هشارك عشان ما اشيلش ذنب الاتنين
لما مشيت وروحت جه البدو ضربوا بالآلي ع الامن وع المتظاهرين الامن رد عليهم بس ولا البدو كان بيقع منهم حد ولا الامن، المتظاهرين بس كانو بيقعوا
كل صحابي اللي كانوا هناك اكدوا إن الامن والعرب لما كانوا بيضربوا على بعض محدش منهم وقع كل اللي بيقع كان لما الضرب بيتحول ع المتظاهرين
انا كدة خلصت اللي عندي ودة اللي شوفته ودي شهادة ربنا يحاسبني عليها لأن دي ارواح ناس ومكانش ينفع اسكت
